සිසු සැරිය පාසල් බස් සේවාව සඳහා වැය වන සම්පූර්ණ වියදම රජයට දැරීමට නොහැකි තත්ත්වයක් උද්ගත වී ඇති බව කැබිනට් ප්‍රකාශක අමාත්‍ය බන්දුල ගුණවර්ධන මහතා පවසයි.
ප්‍රවෘත්ති දෙපාර්තමේන්තුවේ ඊයේ (මැයි 30) පැවති කැබිනට් තීරණ දැනුම් දීමේ මාධ්‍ය හමුව අමතමින් අමාත්‍යවරයා පැවැසුවේ මේ සඳහා යම් අයකිරීමක් සිදුකිරීමට සිදුවන බව ය.
ඔහු පවසන්නේ රට තුළ පවතින මූල්‍යම අපහසුතා හේතුවෙන් එම තීරණයට එළඹි බව ය.
සිසු සැරිය බස් රථ සේවාව සැපයීමේදී අදාළ ගාස්තුවෙන් 70%ක් රජයෙන් ලබා දීමටත් ඉතිරි 30%ක අගය මවුපියන්ගෙන් අයකර ගැනීමටත් සිදුවන බව අමාත්‍යවරයා පැහැදිලි කළේ ය.
එම ගෙවීම හෝ සිදුකර ගැනීමට නොහැකි මවුපියන් සිටී නම් එනම් දිළිඳු සහනාධාර ලබන පවුල්වල දරුවන් සඳහා කිසිදු අයකිරීමකින් තොරව එම සේවාව ලබා දීමට තීරණය කර ඇති බව ද අමාත්‍යවරයා පැවසීය.
එලෙස 30%ක් හෝ අයකර ගැනීමට නොහැකි වුවහොත් එම සේවාව සම්පූර්ණයෙන් ම නවතා දැමීමට සිදුවන බවද අමාත්‍යවරයා වැඩිදුරට ත් ප්‍රකාශ කළේ ය.
