අනුප්‍රාප්තික ජනාධිපතිවරයා තමන්ගේ ගෝලයා වන අගමැති දිනේශ් ගුණවර්ධන දමා පාර්ලිමේන්තු වරප්‍රසාදවලට සැගවී ශ්‍රේෂ්ඨාධිකරණයේ තීන්දුව පිළිගන්නෑ කියන බවත් ඔවුන්ට මේ කතාව පාර්ලිමේන්තුවේ කියන්නේ නැතිව එළියට ඇවිත් කියන ලෙස කැබිනට් මණ්ඩලයට, අගමැති දිනේෂ් ගුණවර්ධනට සහ ජනාධිපතිවරයාට අභියෝග කරන බවත් එසේ කිව්වොත් එය උසාවියට අපහාස කිරීමක් සිදුවන බවත් විපක්ෂ නායක සජිත් ප්‍රේමදාස මහතා පැවසීය.
විපක්ෂ නායක සජිත් ප්‍රේමදාස මහතා මේ බව කියා සිටියේ රත්නපුර, කහවත්ත නගරයේ පැවැති සමගි ජන බලවේගයේ ජනපවුර වැඩසටහන අමතමිනි.
මෛත්‍රීපාල සිරිසේන මහතා ජනාධිපතිවරයා ලෙස සිටින කාලයේ පාස්කු ප්‍රහාරය සම්බන්ධයෙන් ඔහු ගත් තීන්දු තීරණ නිසා ජනාධිපතිවරයා ලෙස කටයුතු කිරීමෙන් අනතුරුව ශ්‍රේෂ්ඨාධිකරණයේ මූලික අයිතිවාසිකම් පෙත්සම්වලට පිළිතුරු දීමට සිදුවූ බවත් කවුරුත් සදාකාලික ජනාධිපති, අගමැති සහ ආණ්ඩු බලය හොබවන්නේ නැති නිසා මෙවර මැතිවරණයෙන් පසුව ව්‍යවස්ථාව කඩකරන්නට උත්තරීතර නීතිය කඩකරන්නට ශ්‍රේෂ්ඨාධිකරණ තීන්දු කඩකරන්න කටයුතු සියලු දෙනාම තරාතිරමකින් තොරව උත්තර බදින්න සිදුවන බවත් විපක්ෂ නායකවරයා පැවසීය.
රජය ව්‍යවස්ථාව උල්ලංඝනය කරද්දි කයිය නායකයා සද්ද නෑ.
මෙරට ව්‍යවස්ථාව අමුඅමුවේ උල්ලංඝනය කරන විට අධිකරණ තින්දු අභියෝගයට ලක් කරන විට රට බේර ගන්නවා කියන කයිය නායකයෝ නිෂ්ශබ්ධ බවත් වචනයක්වත් ඒ ගැන කිව්වේ නැති බවත් ජනාධිපතිවරයා අගමැතිවරයා සහ කැබිනට් එක උසාවියට අපහාස කරන විට කයිය නායකයා නිහඩව ඇති බවත් ඔහු ද ආණ්ඩුවත් එක්ක ඩීල් එකක් ඇති බව පෙනෙන්නට ඇති බවත් කයිය නායකයාට ජනාධිපති හා රජයත් එක්ක ඩීල් එකක් තිබ්බට සමගි ජන බලවේගයට ඩීල් එකක් ඇත්තේ ජනතාව සමඟ පමණක් බවත් විපක්ෂ නායකවරයා මෙහි දී පැවසීය.
මැණික් සඳහාම වෙන් වූ ජාතික ප්‍රතිපත්තියක්
ලෝකයේ මේ වන විට මැණික් ස්වර්ණාභරණ ක්ෂේත්‍රය ඩොලර් බිලියන 200ක කර්මාන්තයක් වී ඇති නමුත් අපේ රටේ ඇති අක්‍රමවත් මැණික් හා ස්වර්ණාභරණ ප්‍රතිපත්තිය තුළ මැණික් කර්මාන්තයේ බරපතල කඩාවැටීමක් ඇති බවත් එම නිසා මැණික් කර්මාන්තයේ පුනරුදයක් නිර්මාණය විය යුතු බවත් මැණික් කර්මාන්තයට සම්බන්ධ සියලු දෙනාම ශක්තියක් ලබන නව මැණික් හා ස්වර්ණාභරණ ප්‍රතිපත්තියක් නිර්මාණය කරන බවත් විපක්ෂ නායකවරයා පැවසීය.
බදු සහන රැසක්
අද වන විට රළු ගල්වලට සහ අනෙකුත් ස්වර්ණාභරණ ආම්පන්නවලට ලබා දී ඇති වැට් බද්ද ඉවත් කර පසුගිය කාලයේ තිබූ ඩොලර් 200 ක්‍රමවේදය ආනයනය වලට ක්‍රියාත්මක කර මෙරට අපනයන කරුවන්ට, කර්මාන්තකරුවන්ට හා නිෂ්පාදන කරුවන්ට ශක්තියක් ලබා දෙන බවත් මැණික් කර්මාන්තයේ ආනයනයවලට වැට් බදු ගැසීම නිසා හොංකොංවල මැණික් කර්මාන්තය ඉහළට ගොස් ඇති නිසා එය නැවත අප රටට ලබා ගෙන මැණික් කර්මාන්තයේ පුනරුදය ආරම්භ කරන බවත් විපක්ෂ නායකවරයා පැවසීය.
එසේම පතල්කරුවන්ට නවීන යන්ත්‍ර සහන මිලට ලබා දී, අපනයන ප්‍රවර්ධනය කරන්නට මෙන්ම අනෙකුත් කටයුතු සඳහා සරල ආදායම්බදු ක්‍රමයක් ලබා දීමට අපේක්ෂා කරන බවත් ශුද්ධ ලාභයට බදු අය කිරීම වෙනස් කරන බවත් පතල් කම්කරුවන්ට රක්ෂණය දීම ඇතුළු පතල් හිමියන්ට ශක්තියක් ලබා දීමට අපේක්ෂා කරන බවත් රත්නපුරය කේන්ද්‍ර කර ගෙන මැණික් කර්මාන්තය හරහා මේ ක්ෂේත්‍රය ඉහළටම ඔසවා තබන බවත් විපක්ෂ නායකවරයා මෙහි දී පැවසීය.
ලැයිම් කාමර ජීවිතයට සමු දී තේ ඉඩමක හිමිකාරීත්වය ලබා දෙනවා
එමෙන්ම තේ කර්මාන්තය ශක්තිමත් කර මේ වන විට ලැයිම් කාමරවලට සීමා වී සිටින වතු ප්‍රජාවට හැමදාමත්ම වැටුප් වැඩි කරන බොරු ප්‍රකාශ නොකර හාම් පුතුන් සමඟ හොරු ගිවිසුම් ගහන කම්කරුවා විනාශ කරන රටාවකට නොගෙස් වතුකම්කරු ප්‍රජාව කුඩා තේවතු හිමියන් බවට පත් කර මුඩු ඉඩම් භූමි වගා භූමි බවට පත් කර වතු කම්කරුවන් මෙන්ම රැකියා විරහිත තාරුණ්‍යට මුඩු ඉඩම් ලබා දී කුඩා තේ වතු හිමියන් බිහි කරන බවත් එමෙන්ම තේ ආනයනය විනිවිදභාවයෙන් යුක්තව ක්‍රියාත්මක කිරීමත් තේ ආනයනය නිසි ක්‍රමවේදයක් තුළ ක්‍රියාත්මක කරන බවත් විපක්ෂ නායකවරයා මෙහි දී පැවසීය.
