ජනාධිපති රනිල් වික්‍රමසිංහ මහතා විසින් හෙට දිනයේ කැදවා ඇති පක්ෂ නායක රැස්වීමේදී පාර්ලිමේන්තු තේරීම් කාරක සභාවක් ස්ථාපිත කිරීමට ගෙන ඇති යෝජනාවට විරෝධය පළ කිරීමට සමගි ජන බලවේගය තීන්දු කොට ඇති බව වාර්තා වේ.
මේ සම්බන්ධයෙන් පසුගිය දින කිහිපය පුරාම සජබ ජ්‍යෙෂ්ඨයන් අතර සාකච්ඡා පැවැත්වී ඇති අතර එහිදී සියලු දෙනාම පාහේ පෙන්වා දී ඇත්තේ පළාත් පාලන ආයතනවල මන්ත්‍රී සංඛ්‍යාව අඩු කිරීම සහ මැතිවරණ වියදම් නියාමනය කිරීම, තරුණ නියෝජනය ඉහළ නැංවීම ආදී යෝජනා ඉදිරියට දමමින් ආණ්ඩුව පාර්ලිමේන්තු තේරීම් කාරක සභාවක් ස්ථාපිත කිරීමේ යටි අරමුණ වී ඇත්තේ පළාත් පාලන මැතිවරණය කල් දැමීම බවකි.
උතුරේ ප්‍රශ්නය විසදීම, පළාත් සභා මැතිවරණය පැවැත්වීම වැනි යෝජනා පෙරට දමමින් දෙමළ පක්ෂ මන්ත්‍රීවරුන් ඊට නම්මවා ගැනීමට ආණ්ඩුව සැලසුම් කර ඇති බවද මෙහිදී ජ්‍යෙෂ්ඨයන් විසින් විපක්ෂනායකවරයා වෙත පෙන්වා දී ඇත.
එසේ හෙයින් මෙම යෝජනාවට විරුද්ධ විය යුතු බව ඔවුන්ගේ ස්ථාවරය වී කිබේ.
ඒ අනුව හෙට දිනයේ පැවැත්වෙන පක්ෂ නායක රැස්වීමේදී සිය පක්ෂ ස්ථාවරය පක්ෂ නායකයන්ට දැනුම් දීමට විපක්ෂනායකවරයා තීරණය කොට ඇති බව දැනගන්නට තිබේ.
